Poslovne vijesti - Makedonija

„Нордеус” отвора развоен центар во Скопје

Kомпанијата „Нордеус“, креатор на најпопуларната онлајн спортска видеоигра на планетата - Top Eleven, ги објави плановите за отворање развоен центар во Скопје, што е дел од стратегијата за глобален развој и отворање на „центри Нордеус” по светот, на што претходеа основање канцеларии во Сан Франциско, Даблин и во Белград.

- Македонија има голем број талентирани луѓе, на кои сакаме да им понудиме можност да го покажат своето знаење и умешност. Диверзификацијата од овој тип ќе ни помогне да добиеме свежи идеи и нов поглед на реализација на нашите проекти, поради што токму скопскиот развоен центар ќе работи на еден потполно нов производ - изјави Бранко Милутиновиќ, CEO на „Нордеус“.

Kанцеларијата во Скопје, која во почеток ќе вработи околу 20 лица, е само дел од планот на компанијата за развој, кој подразбира понатамошни инвестиции во светските центри на ИТ-индустријата, но и на територијата на Балканот.

За директор на „Нордеус“ во Македонија е именуван Марјан Петковски, искусен софтверски инженер, кој претходните седум години работел во развојниот центар на „Микрософт“ во Kопенхаген, Данска, а својата кариера одлучи да ја продолжи во Македонија и со тоа да биде пример и за другите. Тој вели дека нашите талентирани стручњаци, по ништо не заостануваат зад колегите од Западна Европа и, всушност, по идеите, визиите и желбите за успех се и пред нив.

- Главен проблем е тоа што на квалитетните инженери ретко кој им нуди можност да се докажат, а немале ни шанса да бидат дел од голем успешен тим на светски позната компанија, која пласира производи на сите континенти - вели Петковски.

Отворањето на канцеларија во Скопје е во период на големите успеси за „Нордеус“ и Top Eleven. Во средината на април, бројот на месечно активни играчи скокна на над 11 милиона, зацврстувајќи го Top Eleven на позицијата најпопуларна онлајн спортска видеоигра на „Фејсбук“ и една од десетте најиграни игри на оваа социјална мрежа. Top Eleven претставува и една од Топ-5 најпопуларни апликации на „Гугл плеј“ и „Епл стор“ низ европските продавници веќе неколку месеци. Kон крајот на март потпишан е договор со, по многумина најдобриот фудбалски тренер на светот, Жозе Мурињо, кој стана заштитно лице на Top Eleven.